....un jeden Morgen Wellness pur

Familie | 50plus / Ruhestand (Reife Zeit)

Rastede - Siet eenige Tied gah ik nu jeden Morgen to´n Swemmen. Un jeden Morgen sünd dor de sülvigen Lüüd, de sogenannten Fröhswemmer. Man seggt sik „Moin“ to un de meisten kennt sik mit Naam. „Moin Klara“, „moin Annegret“, „moin Günter“, „moin Lothar“ un so wieter. Ik wull al seggen: „Goode Nacht, John Boy“, hebb mi dat denn aver doch noch verknepen. „Woher kennt de sik al?“ hebb ik mi fraagt. Mit de Tied hebb ik dat denn ruutkreegen, dat veele al johrelang oder sogaar Johrteintelang  swemmen gaht un sik dorher kennt. "All Achtung", dach ik, "of ik dat ok woll so lang dörholl?" Nadem ik mit Swemmen fardig bin, gah ik noch in dat lüttje Therapiebecken un maak dor noch een poor Övungen. Pünktlich um Klock twintig na söven kaamt dor denn Harry, Werner, Lothar un Günter. Un denn ward dat intressant. Wat de sik allens to vertellen hebbt!  All möögliche Themen kaamt op´n Disch, ...äh...ik meen.... in´t Water. Un wat to lachen gifft dat ok jümmers. Jo, toeerst weer ik jo noch´n beeten schüchtern un hebb so vör mi hengrient un dacht: „De kennt mi bestimmt nich.“ Aver irgendwann keem ik dorachter, dat se mi doch kennt von „Mien Rastää“. De ganze Tied harr ik dat al in´n Kopp, maal över se to schrieven un vandaag hebb ik se denn fraagt. Jo, dat wullen se woll geern. Pünktlich um half acht gaht se denn noch in den Whirlpool.
Wenn dat nich Wellness pur is, un dat doot se jeden Morgen! Un dat nu al siet 12 Johr!

Jo, Swemmen deiht Körper, Geist un Seele good. Dor kannst du so richtig optanken.
Wieter so, Jungs!
 

Schlagworte: Frühschwimmen, Hallenbad

Geschrieben auf: mein-rastede.de