Palais up Platt

Geschichte | Ortsgeschichte(n)

Rastede - Jo, dat weer wat besünners an´n Söndag Morgen.

Eegentlich har ik so richtig utslaapen wullt, over gegen Klock tein reep mien Moder an un frog, of ik nich mitwull na de plattdütsche Führung in´t Palais.

Na ja , wook weer ik nu sowieso all, denn kunn ik ok jo mitgohn. Gau fröhstückt un denn man los mit´n Rad af in´n Palaisgorden.

An´n Ingang stunn uk all de Gästeführerin Renate Janssen (wat miene Tante is) un begrödte all de Neeschierigen, de sik maal wat von Palais up platt vertellen laten wullen. Alltohoop weern wi so 17 oder 18 Tohörers.

Um Viddel na Ölben gung dat denn uk los. Wi keeken us na und na de ünnerscheedlichen Rüüme in´n Palais an und Fro Janssen vertell us dit un dat öber denn Herzog von Ollenborg, siene Kinner un Kinneskinner un de Entstehung von dat Rasteder Schloss un us Palais. Ik at Rasteder weer natürlich all in´t Palais wesen, over eenige annere Besökers noch nich.

Ik möt togeben, von de ganze Geschichte, welken Herzog nu wann na Rastede komen is, dat heb ik mi nich so good marken kunnt. Over de Herrlichkeit von de Utstaffierung von de Zimmers is mi woll in Erinnerung bleben: Schönet Parkett in Sternform, an de Wände een "Eierstab" un dat Holt unnern Bööhn weer anmaalten Gips.

De Döören von de Zimmers hebbt se all in eene Reeg boot. In´n Eetzimmer weer de Beleuchtung schlecht - dat eeten hoffentlich nich uk. De Herzogin har eene eegene Kamer mit mojen Utblick ton Anhübschen, wo man uk "Schmollzimmer" to seegen kunn - dat wünscht man sick at Fro doch vandogen noch!

At wi binnen allns seen harrn, gung dat no buten hin. De Gorden is doch wohrhaftig 5 Hektar groot un eenige Bööm all so 160 Johr olt. Wat de woll all alln´s sehn und belevt hebbt!

Dat de Palaisgorden heel moi is und so heimelig und wat ganz besünners, dat weet wi Rasteder jo all lang! Un wer nich, de möt dor eenmaal hingohn, an besten mit´n Picknickkörf. Dat geiht uk ohne Rekordversuch von Bäckerei Müller und Egerer.

Wiel disse plattdütsche Führung de allereerste weer, geev dat to´n gooden Afschluss noch eene leckere Prinzessinnen-Bowle, de wi us bi strohlenden Sünnenschien buten vör dat Palais smecken läten.

Het sick doch lohnt, dat ik upstahn bünn! Hest good mokt Renate!

Wer ok mal eene Führung up Platt mitmoken will: de nächste is an´n 11. Mai un denn woller an´n 8. Juni um Klock 5 , Drapen up denn Denkmalplatz för de St.-Ulrichs-Kark.

Schlagworte: Gästeführung

Geschrieben auf: mein-rastede.de